Fatima Chebchoub
طبيق الورد
يا الصايل على قرانه بنخوة هايلة مسرجة
يا هايم ف جنان ربيعه غابة مخلجة
يا الساقي بعيونه خمرة طايلة مثلجة
هاج عطشي مارو
زاد مرضي بلا دوى
يا طبيق الورد جواهره ضحكة فلجة
هايمة فيك اليوم عيني عميا مزلجة
قاصدة الصدر الحنين ليه أنا وحدة محوجة
يا قلب وافي بلا غدر
جيتك وحدي بلا عذر
وإلا حسبه ضربة من راس اللحدة مخرجة
وحركات الهم حالفة في وحدي مرهجة
غرست ف القلب نصلة حافية مصدية معوجة
ثقال حملي بلا قدر
ضياق شملي بلا صبر
جات سلاطة حارة كحلة مرة محدجة
مانويتها تكبر وتصير لي لفعة مدرجة
تقتلني ف النهار ميات ألف مرة بلا رجى
وصبحت بلاك مقهورة
قيدك اجهد من الدورة
ماقديت نتفك منه سناسله علي مبلجة
مقفولة الارسام ناره وقطبانه حامية معلجة
ماليها حل غير إيديك انت ياسماع الرجا
تسرح كبلي بالوفا
وتجمع شملي ف الصفا
وترد لعيني نظرة فزينك والهة مفوجة
يتهنى بالي وخاطري وروحي تفني متوجة
ونقول أنا زيان سعدي
الحبيب وفا لي بوعدي
وخا جيته بلا عذر غير بالشوفة والنظر
فهم قصدي بالبطر ونزل راسي على الصدر